Аёллар рўзаси ҳақида, яъни ҳайз ва нифос вақтидаги рўза ҳақида тушунтириб берсангиз. Бундай вақтда тутилмаган рўзага қазо тутиладими ёки йўқми?

ЖАВОБ: Бисмиллаҳир Роҳманир Роҳийм
Ҳайз ёки нифос кўрган аёлга рўза тутиш вожиб эмас, балки, мумкин ҳам эмас. Чунки, нифос ёки ҳайзли бўлатуриб тутилган рўза умуман рўза бўлмайди.
Аёллар Рамазонда ҳайзли ё нифосли бўлиб қолсалар, покланганларида қазосини тутиб берадилар.

Муоза розияллоҳу анҳодан ривоят қилинади:
«Оишадан:
«Нима учун ҳайзли аёл рўзанинг қазосини тутади-ю, намознинг қазосини ўқимайди?» – деб сўрадим.
«Сен Ҳарурийямисан?!», – деди.
«Мен Ҳарурийя эмасман, лекин сўраяпман, холос», – дедим.
«Бизга шу ҳол етганда, рўзани қазо қилишга амр этилар эдик ва намозни қазо қилишга амр қилинмас эдик», – деди».
Бешовлари ривоят қилишган. Валлоҳу аълам.