Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

1. Маййитнинг бобоси унинг отаси туфайли ҳажбга учрайди. Шунинг­дек, яқин бобо узоқ бобони тўсади.

2. Маййитнинг ота бир, она бир ака-укалари унинг отаси, ўғли ва ўғил набираси билан тўсилади.

Бу «маййитнинг ота бир, она бир ака-укалари унинг отаси, ўғли ва ўғил набираси бор жойда мерос олмайди», деганидир.

3. Маййитнинг ота бир, она бир биродарлари ҳамда ота бир, она бир биродарларни ҳажб қилувчилар маййитнинг ота бир биродарларини ҳажб қиладилар.

Шунингдек, уларни бошқалар билан асаба бўлган ота бир, она бир опа-сингиллар ҳам ҳажб қилади.

4. Маййитнинг она бир биродари ёки она бир синглисини унинг бола-чақаси ва ота, боболари ҳажб қилади.

5. Маййитнинг ўғли унинг ўғлининг ўғлини (набирасини) ҳажб қилади.

Ўғил чеварани ўғил невара ҳажб қилади.

Яъни, маййитнинг ўғли бўлса, унинг набира ва чеваралари мерос олмайдилар. Кейин ҳам шу тартибда кетади. Ўғил бўлмаса, ўғил невара, ўғил невара бўлмаса, ўғил чевара мерос олади.

6. Маййитнинг туғишган биродарининг ўғлини маййитнинг отаси, бобоси, ўғли, ўғил невараси, туғишган биродари ва ота бир биродарлари ҳажб қиладилар.

7. Маййитнинг туғишган (ота бир, она бир) биродарининг ўғли ҳамда уни (туғишган биродарнинг ўғлини) ҳажб қилувчилар маййитнинг ота бир биродарининг ўғлини ҳажб қилади.

8. Маййитнинг ота бир биродарининг ўғли ва уни ҳажб қилувчилар маййитнинг амакисини ҳажб қилади.

9. Маййитнинг амакиси ҳамда уни, яъни ўша амакисини ҳажб қилувчилар маййитнинг ота бир амакисини ҳажб қиладилар.

10. Маййитнинг ота бир амакиси ва уни ҳажб қилувчилар маййитнинг амакисининг ўғлини ҳажб қилади.

11. Маййитнинг амакисининг ўғли ва уни ҳажб қилувчилар маййитнинг ота бир амакисининг ўғлини ҳажб қилади.

«Ҳадис ва ҳаёт» китобидан