«Қуръони Карим мусобақаси – 1442» танлови якунига етди
Аввал хабар қилганимиздек, бугун 16 май куни устоз Зайниддин қори Муҳаммад Юсуф хотираларига бағишланган «Қуръон мусобақаси – 1442» танлови қизғин руҳда бўлиб ўтди. Унда 28 нафар финал йўлланмасини қўлга киритган қорилар ўз тиловатлари билан барчанинг эътирофларига сазовор бўлишди.
Шуниси эътиборга моликки, мазкур танловни баҳолаш жараёнида таҳрир ҳайъати – устоз қориларга осон бўлгани йўқ. Бир-биридан иқтидорли қориларнинг қироатидан энг мукаммалини танлаб олиш ниҳоятда қийин кечди. Иштирокчиларнинг қироатига, овозига ва тажвидига диққат қилган ҳолда ғолиблар аниқлаб олинди.
Унга кўра, тиловат йўналиши финал баҳсларида учинчи ўрин соҳиби Ориф Абдуваҳобов 354,5 балл тўплади. Иккинчи ўрин эса 355,75 балл тўплаган Хайруллахон Илёсхонов ва Низомиддин Исмоиловларга насиб этди. 394 балл билан ғолибликни қўлга киритган Муҳаммадворис Йўлдошев энг биринчи ўрин соҳиби деб топилди.
Ҳифз йўналиши баҳслари натижаларига кўра, учинчи ўринни 316,75 балл тўплаган икки қори Абдуллоҳ Абдусатторов ва Муҳаммадали Ҳайитбоевлар эгаллашди. Иккинчи ўринга 342 балл олган Аҳмаджон Ворисов лойиқ кўрилди. Ҳифз йўналишининг мутлақ ғолиби 387,75 балл олган Муҳаммад Иброҳим Каримовга насиб этди. Олий ўрин соҳиби SPARK автомобили билан тақдирланди.
Шунингдек, мусобақа якунида танлов иштирокчилари ва ғолибларга қимматбаҳо совғалар тақдим этилди.
Шу билан «Қуръон мусобақаси – 1442» ўз якунига етди.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
