Инсонийликнинг баҳоси
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аллоҳ таоло Қуръони Каримда шундай марҳамат қилган:
هَلْ جَزَاء الْإِحْسَانِ إِلَّا الْإِحْسَانُ
"Эҳсоннинг мукофоти, фақат эҳсондир" (Раҳмон сураси, 60-оят).
Бир киши ошхонада овқатланиб ўтирган эди. Ташқаридан бир болакай билан қизалоқ ошхона деразаси яқинига келиб, ҳалиги одамнинг овқат ейишини томоша қилиб турар эдилар.
Шунда у ўша болажонларни ичкарига киринглар, деб имлади. Улар кириб, ўша одамнинг олдига ўтирдилар. Кейин у официантга болалар учун ҳам таом, ичимлик олиб келишларини айтди.
Беғубор меҳмонлар таомларни еб, шарбатларни ичиб, қоринлари тўйиб, хурсанд бўлиб, ташқарига чиқиб кетдилар.
Бояги киши ҳам таомланиб бўлиб, касса олдига келиб, пул тўламоқчи бўлди. Шунда кассир йигит қўлидаги «Бизда инсонийлик баҳосини ҳисоблайдиган аппарат йўқ!» деб ёзилган қоғозни мижозга узатди-да, ундан пул олмади.
Бугун жамиятимизда отасидан айрилган норасидаларга ёрдам қўлини чўзаётган турли хайрия гуруҳлари фаолият олиб боряпти. Масалан, «Саховат Наманган», «Меҳр 2020», «Юрак амри», «Қўшнилар» хайрия гуруҳлари шулар жумласидандир.
Аллоҳ таоло хайрия гуруҳларида хизмат қилаётган барча холис биродарларимизни, уларга ҳомийлик қилаётган муҳсин бандаларни паноҳида асраб, ажру мукофотларини кўпайтириб берсин!
Роббимиз етимпарвар биродарларимизнинг барчаларини, уларнинг қаторларида бизни ҳам жаннатида Пайғамбаримиз соллаллоҳу алайҳи васалламга қўшни қилсин!
Аллоҳ таоло барчамизни Ўзининг ҳидоятидан айирмасин ва хотимамизни чиройли қилсин!
Нозимжон Ҳошимжон тайёрлади
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
