Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Қобийса ибн Ҳалиб розияллоҳу анҳудан, у киши отасидан ривоят қилинади:

«Расулуллоҳ соллаллоҳу алайҳи васаллам бизга имомлик қилар, бурилганларида эса ҳар икки томонлари: гоҳида ўнг, гоҳида чап томонлари билан бурилар эдилар».

Термизий ва Абу Довуд ривоят қилганлар.

Шарҳ:. Намозни ўқиб бўлиб, ортга қайрилишда гоҳ ўнг, гоҳ чап томон билан қайрилиш Пайғамбаримиз соллаллоҳу алайҳи васалламнинг одатлари бўлган экан. Имомларимиз ҳам шундай қилмоқлари марғубдир.

Самура ибн Жундаб розияллоҳу анҳудан ривоят қилинади:

«Набий соллаллоҳу алайҳи васаллам намозни ўқиб бўлсалар, биз томон юзланар эдилар».

Бухорий ва Абу Довуд ривоят қилганлар.

Шарҳ: Намозни ўқиб бўлгандан кейин имомнинг қавмга юзланиб ўтириши мана шу ҳадисдан олинган. Олдинги ҳадислардаги ўнг ёки чап томонлар билан бурилиш ҳам мана шу пайт учун айтилган.

Муғийра розияллоҳу анҳудан ривоят қилинади:

«Набий соллаллоҳу алайҳи васаллам:

«Имом намоз ўқиган жойидан бошқа жойга ўтмай туриб, намоз ўқимайди», дедилар».

Абу Довуд ва Ибн Можа ривоят қилганлар.

Шарҳ: Яъни, имом суннат намозни фарз намозни ўқиган жойидан бошқа жойга ўтиб ўқийди. Шунингдек, бошқа намозхонлар ҳам жойларини ўзгартириб ўқиганлари афзал. Чунки ҳар бир намоз ўқилган жой, унинг тепасидаги осмон қиёмат куни намозхон фойдасига гувоҳлик беради. Киши қанча кўп жойда намоз ўқиса, гувоҳлари шунча кўпаяди. У ўлган куни ўша ер ва осмонлар йиғлайдилар.

«Ҳадис ва ҳаёт» китоби асосида тайёрланди