Ҳақиқий саодат
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ҳақиқий бахт-саодатни инсон Аллоҳга итоат, Унга таслимият ва муҳаббат билангина топади, чунки Аллоҳ бандасини Ўзига муҳтож қилиб яратган. Бу муҳтожлигимизни фақатгина Аллоҳнинг Ўзи тўлдириши мумкин бўлган бўшлиқ билан қиёслаш мумкин. Инсон ўзича бу бўшлиқни нимадир билан тўлдирмоқчи бўлади. Жумладан, моддий бойлик, шон-шуҳрат, обрў-мартаба билан тўлдирмоқчи бўлади, лекин барибир унга нимадур етишмаётганини ҳис қилади ва у нарса нималигини тополмай гуноҳ йўлларига кира бошлайди. Аллоҳнинг муҳаббати йўқлиги учун у бўшлиқни шайтон васвасаси билан тўлдиради. Айрим мол-мулки кўп инсонлар ўша етишмаётган нарсани тополмай гиёҳвандликка, қиморга, зинога берилиб кетади ва охири жонига суиқасд қилиб, ҳаётига нуқта қўяди. Ҳаётда бундай мисоллар жуда кўп, инсоннинг ҳамма нарсаси бор, лекин бахти йўқ, ҳузури йўқ. Ўша ҳаётидаги, Аллоҳга бўлган муҳаббатгина тўлдириши мумкин бўлган бўшлиқни нима билан тўлдиришни билиша олмай ўзларига зулм қилишади. Аллоҳ муҳаббатидан бошқа ҳеч бир нарса ҳаётимизда бахт-саодат ва ҳузур беролмайди, ўша бўшлиқни тўлдиролмайди. Банда Аллоҳни танимагани учун, севмагани учун ҳақиқий бахт-саодатни тополмайди. Аллоҳ севгисини қозонган инсон, ҳамма нарсани қўлга киритади, Аллоҳ севгисини йўқотган инсон эса ҳамма нарсасини бой беради. Дунёмиз ҳам, охиратимиз ҳам Унинг қўлида. Аллоҳ бандасини севса Ўзига дўст тутади. Ўзига дўст бўлганларни эса, душманимиз бўлган нафс ёмонлиги ва шайтон васвасасидан асрайди. Инсон қалбини Аллоҳ севгиси билан тўлдирсагина қалби ҳузур ва саодат топади.
«Улар иймон келтирган ва Аллоҳнинг зикри ила қалблари ором топганлардир. Огоҳ бўлингким, Аллоҳнинг зикри ила қалблар ором топур!» (Раъд сураси, 28- оят.).
Муҳаммад Али Муҳаммад Юсуф
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
