Қирғизистоннинг биринчи муфтийси Кимсанбой ҳожи Абдураҳмонов
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Марказий Осиёнинг етук уламоси, Қирғизистоннинг биринчи муфтийси бўлган Кимсанбой ҳожи Абдураҳмонов 1940 йил 10 июль куни Фарғона вилоятининг Янгиобод қишлоғида таваллуд топди.
У 1957 йилда ўрта мактабни тамомлаб, 1959 йил Бухоро шаҳридаги Мир Араб мадрасасига ўқишга кирди.
1962-1966 йилларда Совет Иттифоқи Узоқ Шарқ денгиз флотида хизмат қилди. Хизматдан қайтгач, Мир Араб Ислом мадрасасида ўқишни давом эттирди ва 1971 йилда таҳсилни муваффақиятли тамомлади.
1971-1976 йилларда «Совет Шарқи мусулмонлари» журналида бир неча йил хизмат қилган.
Олим илмни давом эттириш мақсадида 1976-1980 йилларда Иордания давлат университетининг шариат факультетида таҳсил олади.
1980-1982 йилларда «Совет Шарқи мусулмонлари» журналининг араб ва ўзбек тилларидаги нашрлари муҳаррири бўлиб ишлаган.
1982-1986 йилларда Кимсанбой ҳожи Бухородаги Мир Араб мадрасаси мудири лавозимида фаолият олиб борган.
Кейин 1987-1989 йилларда Ўрта Осиё ва Қозоғистон мусулмонлари диний назоратининг фатво бўлимида фаолиятини давом эттиради.
1990-1992 йиллар ўртасида диний назоратнинг Қирғизистондаги вакили, Қирғизистон қозиси бўлиб ишлайди. Кимсанбой ҳожи Абдураҳмонов шу йилнинг август ойида ўтказилган Қирғизистон мусулмонларининг биринчи қурултойида янги тузилган Қирғизистон диний бошқармасининг раҳбари ва муфтийси этиб сайланади.
1992 йилда уламонинг ташаббуслари билан Бишкекда диний мадраса очилади.
1993 йилда ушбу мадраса «Ҳазрати Али» номидаги ислом институтига айлантирилади. Собиқ муфтий, эътиборли уламо Кимсанбой Абдураҳмонов Қирғизистонда кўплаб масжидлар қурилишига ҳам эътибор қаратган. Собиқ Иттифоқ даврида Республикада 36 та масжид фаолият юритган бўлса, Кимсанбой Абдураҳмоновнинг ташаббуси ва тадбири билан уларнинг сони мингдан ортган.
Манбалар асосида Хуршид Маъруф тайёрлади
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
