Офтоб аритмагин кўнгил кўзидан...
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Машаққат меҳнатдан мумдек эригай,
Ношуд кетмон тутса илдиз чиригай,
Оқибат ўртанса, қадр қаригай,
Агар юргинг келса бахтнинг изидан,
Офтоб аритмагин кўнгил кўзидан.
Муҳаббат меҳробин меҳринг ёритмиш,
Иймон измидасан, дуо даритмиш,
Нопок идиш асли сутни иритмиш,
Доғини қидирма ойнинг юзидан,
Офтоб аритмагин кўнгил кўзидан.
Ёшини сўрама кўҳна чинорни,
Замин тик тутади қадим минорни,
Кўрганлар борми, айт, оппоқ ғуборни,
Норизо бўлсанг ҳам таом тузидан,
Офтобинг аритма кўнгил кўзидан.
Садоқат самоси дилнинг тубида,
Аввал илдиз гуллар гулнинг тубида,
Шоҳ-гадо бир ётар гилнинг тубида,
Ким вафо истаса ўғил-қизидан,
Офтоб аритмасин кўнгил кўзидан.
Насиҳат нидоси ердан чиқмагай,
Ўзин англаганлар қўрдан чиқмагай,
Эр йигит юрт кезар, элдан чиқмагай,
Эзгулик қидирсин, ҳар ким ўзидан,
Офтоб аритмасин кўнгил кўзидан.
Ўзбекистон халқ шоири Маҳмуд Тоир
15.04.2023 й.
«Ҳилол» журналининг 8(53) сонидан
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
