Кимсалар бор...
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Кимсалар бор...
Бир қуёшдин чўлда янтоқ, боғда гул-раъно битар,
Бир қаламдин ким ғазал-у ким эса иғво битар.
Кимса борки, бир дарахтни ўт ёқиб косов қилур,
Кимса борки, бир чивиқдан ўстириб асо битар.
Тил мисоли аридур кимдир андин заҳр йиғур,
Ким эса бол тўплабон шаҳду шакар ҳалво битар.
Биров борки, эгри сўзинг тўғрилаб лутф айлагай,
Биров борки, тўғри сўздин эл аро ғавғо битар.
Зайниддин, доимо бўлгил сен тилингга эҳтиёт,
Тил захми кетмагай, тиғ солган яро битар.
Кўнгил айтур
Нотавон бул кўнгил айтур: ой каби талъатга боқ,
Ой сабаб, Аллоҳ яратган ул ажиб санъатга боқ.
Лол бўлиб суратдек қотдим ҳусни рўйинг олдида,
Ёлборурман бир қиё, эй ой, ўшал суратга боқ.
Майли боқма суратимга жони йўқ тандан не суд?
Кўзларида қота қолган тош каби ҳайратга боқ.
Боқмасанг гар суратимга сийратимдан очма гап,
Сен уни етмайсан англаб минг бир ўшал сийратга боқ.
Томчи сувман гарчиким, ғайратим денгизчадир,
Сен қуёш бўлсанг агарким, мендаги журъатга боқ.
Зайниддин, ой юзга боқма, сен ошиқ бўлсанг вале,
Моҳирўйларни яратган Соҳиби Қудратга боқ.
Зайниддин Баҳриддинов
«Ҳилол» журнали 10(55) сони
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
