Эй илм эгаси!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Зайд Аммийдан, у баъзи фуқаҳолардан ривоят қилади:
«Эй илм эгаси! Илмингга амал қил. Мол-мулкингни ортиқчасини бергин. Ортиқча гапдан тийилгин. Роббинг ҳузурида сенга фойдаси тегадиган сўзнигина сўзлагин.
Эй илм эгаси! Сен ўрганиб, амал қилмаган илм Роббингга рўбарў бўлганингда сенга узр қолдирмайдиган қарши далилдир.
Эй илм эгаси! Аллоҳнинг тоатларидан бирортасига буюрилсанг, у сени қайтарилган нарсалардан, Аллоҳга маъсият қилишингдан тўсади.
Эй илм эгаси! Бировнинг ишини қилишда кучли бўлиб, ўзингга тегишли ишда заиф бўлмагин.
Эй илм эгаси! Биров учун қилинган нарса сен учун қилинган нарсадан сени тўсиб қўймасин.
Эй илм эгаси! Олимларга суҳбатдош бўл, жоҳилларни жоҳиллиги учун кичик санагин, лекин уларни ўзингдан узоқлаштирма, уларни ўзингга яқинлаштир, уларга илм ўргатгин.
Эй илм эгаси! Бирор жойда гапирсанг, гапингни тушуниб гапир. Бирор киши сенга савол берса, унинг ўзи сенга нима деганини тушунмагунча жавоб берма.
Эй илм эгаси! Аллоҳдан ҳам, одамлардан ҳам ғафлатда бўлма. Аллоҳдан ғафлатда бўлиш У Зотнинг буйруқларини тарк қилишдир. Одамлардан ғафлатда бўлиш эса уларнинг ҳавои нафсига эргашишдир. Аллоҳ огоҳлантирган нарсалардан огоҳ бўл, одамларнинг фитнасидан огоҳ бўл.
Эй илм эгаси! Кундузнинг ёруғи қуёш билан бўлади. Ҳикмат ҳам Аллоҳнинг тоати билан бўлади.
Эй илм эгаси! Экин сув ва тупроқ билан бўлади. Иймон ҳам илм ва амал билан бўлади.
Эй илм эгаси! Ҳар бир мусофирнинг зоди роҳиласи бўлади ва – керак бўлганда – ўша зоди роҳиласини ишлатади. Ҳар бир амал қилувчи ҳам охиратда эҳтиёжи бўлса, дунёда қилган амалини топади.
Эй илм эгаси! Билгинки, Аллоҳ сени Ўз ибодатига тарғиб қилса, демак, сенинг Ўз ҳузуридаги қийматингни билдирмоқчи бўлибди. Ундан ўзгага юзланма, акс ҳолда қийматинг тушиб кетади.
Эй илм эгаси! Сени тушунмаган одамга гапирганингдан тош ва темир ташиганинг осонроқ. Тушунмаган одамга гапирган одам ўликка гапирган, қабристонга зиёфат берган одам кабидир».
«Сунани Доримий»
«Ҳилол» журнали 2(59) сон
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
