Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

وَقَالَ عَلِيُّ رَضِي اللهُ عَنْهُ: السُّنَّةُ وَضْعُ الْكَفِّ عَلَى الْكَفِّ فِي الصَّلَاةِ تَحْتَ السُّرَّةِ. رَوَاهُ أَبُو دَاوُدَ وَأَحْمَدُ.

Али розияллоҳу анҳу:

«(Намозда) кафтни кафт устига қилиб, киндикнинг остига қўйиб туриш суннатдир», деди.

Абу Довуд ва Аҳмад ривоят қилганлар.

Шарҳ: Ушбу ривоят Ҳанафий мазҳабида татбиқ қилинган. Буни бошқа кўпчилик уламолар ҳам қўллаганлар.

Шофеъий мазҳабида қўлларни киндикдан юқори қўйиш, Моликий мазҳабида уларни боғламаслик жорий бўлган. Бунга уларнинг ҳам ўзларига яраша далиллари бор. Ушбу хилма-хиллик намозга путур етказмайди, балки бир неча ҳолда ҳам ўқиш мумкинлиги баъзи ҳолларда осонлик яратади.

Шу билан бирга, у ёки бу ривоятни қабул қилишда имомларнинг яшаб турган шароитлари ва шунга ўхшаш бошқа омиллар ҳам эътиборга олинган бўлиши мумкин.

Мисол учун, Ҳанафий уламолар намозда қўлни боғлаб, киндик остига қўйиш ҳақидаги ривоятни қабул қилганлари ҳикматини «Катта кишилар олдида туриш одоби шу. Намозда эса Аллоҳнинг ҳузурида турилади. Модомики, банданинг олдида шундай турилгандан кейин, Аллоҳнинг ҳузурида одоб билан туриш жуда ҳам зарур», дейдилар.

Уламоларимиз «Қўлни боғлаш ҳақидаги ҳадислар Моликий мазҳаби имомларига етиб бормаган ёки уларнинг шартларига тўғри келиб, саҳиҳ бўлмаган бўлса керак», дейдилар.

Моликий мазҳаби уламолари эса «Мусулмон одам жон таслим қилганда уни икки қўлини ёнига қилиб, тобутга солиб, Аллоҳнинг ҳузурига олиб борилади. Намоз ҳам Аллоҳга жон таслим қилишнинг бир туридир. Шунинг учун қўлини ёнига қилиб, ўзини бутунлай Аллоҳга топшириб туриш керак», дейдилар.

«Ҳадис ва ҳаёт» китобининг 4-жузи асосида тайёрланди.