Талоқ бўлиб қайтиб келганга нафақа қилиш
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аёл зоти турмуш қургунича отаси, ака-укаси ёки бошқа бирор эркак қариндошининг нафақасида бўлиши маълум. У оила қуриши билан эрнинг нафақасига ўтади. Энди оиласи бузилиб, эридан ажраган аёлга ким қарайди? Уни нафақа билан таъминлаган киши савоб оладими? Агар савоб оладиган бўлса, қандай ишнинг савобини олади? Ушбу мақолада шу каби саволларга жавоб келади.
عَنْ سُرَاقَةَ بْنِ جُعْشُمٍ: أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ: «يَا سُرَاقَةُ، أَلَا أَدُلُّكَ عَلَى أَعْظَمِ الصَّدَقَةِ - أَوْ قَالَ: أَعْظَمِ مِنَ الصَّدَقَةِ؟ -»، قَالَ: يَا رَسُولَ اللهِ بَلَى. قَالَ: «أَنْ تُكْرِمَ مَرْدُودَةً إِلَيْكَ لَيْسَ لَهَا كَاسِبٌ غَيْرَكَ».
Суроқа ибн Жуъшумдан ривоят қилинади:
«Расулуллоҳ соллаллоҳу алайҳи васаллам: «Эй Суроқа, сенга энг улуғ садақанинг ёки садақадан ҳам улуғроқ нарсанинг далолатини берайми?» дедилар.
«Ҳа, эй Аллоҳнинг Расули», деди.
«Ҳузурингга қайтиб келган ва сендан бошқа таъминотчиси бўлмаган аёлга икром кўрсатмоғинг», дедилар».
Қизми, сингилми, турмуши бўлмай, оиласи бузилиб қайтиб келган бўлса-ю, унга сендан бошқа қаровчи, боқувчи бўлмаса ва сен ҳалол касб ила топганингдан уни нафақа билан таъминласанг, икром қилсанг, жаннатга кирасан.
Одатда, турмуши бузилиб, эриникидан қайтган қиз ёки сингил уйида яхши кутиб олинмайди. Сабр қилиб, ўша ёқда яшайвергани яхши эди, деган мулоҳаза ила уни иложи борича уйига қайтаришга ҳаракат қилинади. Натижада етишмовчиликданми, оғир ботадиган турли гап-сўзларданми ёки бошқа бир хўрликларга чидай олмасданми, ота уйига қайтиб келган бечора келин ноқулай ҳолга тушиб қолади. Ана шундай вазиятда унинг жонига оро кирган, мушкулини осон қилган, уни тушунишга ҳаракат қилиб, унга далда берган ва асосийси, у ўзини сиғиндидай, боқимандадай ҳис қилмаслиги учун, уни нафақа билан таъминлаб турган одам садақадан ҳам улуғроқ иш қилган бўлар экан. Чунки у Набий соллаллоҳу алайҳи васалламнинг ҳадисларига амал қилган бўлади.
Турмуши бузилиб, ота уйига қайтиб келган аёл зотини нафақа билан таъминлаш энг улуғ садақа ёки садақадан ҳам улуғроқ амал ҳисобланишини юқоридаги ҳадиси шарифдан билиб оламиз.
«Яхшилик ва силаи раҳм» китоби 1-жуз
Ўзбекистон Республикаси Дин ишлари бўйича қўмитанинг 2022 йил 5 октябрдаги 03-07/7613-рақамли хулосаси асосида тайёрланди.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
