Ким Аллоҳ учун тавозе қилса... | Иккинчи ҳақ
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ҳар бир мусулмонга тавозе кўрсатиб такаббурлик қилмаслик ярашади. Зеро, Аллоҳ таоло кибрли ва мақтанчоқларни ҳеч ҳам суймайди. Тавозеда тенгсиз бўлган Пайғамбаримиз намуна сифатида доимо бева-бечоралар, етимлар билан бирга юриб, уларнинг ҳожатларини чиқарар эдилар. Бунда биз умматлар учун кўплаб ибратлар бор. Ўзгалар бизга шундай қилганларида эса, бунга сабр қилишимиз керак.
Абу Саид ал-Худрий розияллоҳу анҳудан ривоят қилинган ҳадисда:
«Набий соллаллоҳу алайҳи васаллам кўп зикр айтар, ҳожатини чиқариш учун бева ва мискин(лар) билан юришдан бош тортмас (орланмас) ёки кибр қилмас эдилар», дейилган.
Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам: «Садақа молни камайтирмайди, Аллоҳ авф билан фақат банданинг иззатини оширади ва ким Аллоҳ учун тавозе қилса, Аллоҳ уни (даражасини) кўтаради», дедилар».
Абу Саид ал-Ҳудрийдан ривоят қилинишича, у киши: «Мискинларнинг яхши кўринглар. Мен Расулуллоҳ соллаллоҳу алайҳи васалламнинг дуоларида: (Аллоҳим! Мени мискин ҳолда яшатгин, мискин ҳолда ўлдиргин ва мискинлар ила қайта тирилтиргин) деганларини эшитдим», деганлар.
Демак, қалби синиқ, бечора ва оддий инсонлар билан юриш ўзини хорлаш эмас, балки набавий суннат экан. Бу айни пайтда юксак, камтарлик ҳамдир. Зеро ўзига бино қўйган, бошқа инсонлар дардига шерик бўлишни ўзига эп кўрмайдиган калондимоғ кимсалар бундай ҳамдардликдан, савоб ишлардан бебаҳрадирлар. Халқимиз томонидан «Камтарга камол, манманга завол» деган нақл ҳам узоқ даврлар оша шаклланган ҳаётий тажрибалар хулосасидир.
Абдулҳамид Зайриевнинг
«Мусулмоннинг ҳақ ва вазифалари» китобидан
Ўзбекистон Республикаси Дин ишлари бўйича қўмитанинг 2023 йил 16 январдаги 03-07/184-сонли хулоса хати асосида нашрга тайёрланди.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
