Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

86. Вафот этганингда "Жасад қаерда?" дейишади. Жаноза намози асносида "Жанозани олиб келинглар" дейишади. Дафн этишаётганда "Маййитни олиб келинглар" дейишади. Эътибор берган бўлсанг, исмингни эслашмайди. Шундай экан, қабиланг, мансабинг, насабинг сени алдаб қўймасин!

87. Эй Аллоҳ! Ким торлик устида, юраги сиқилган ҳолда ухлаган бўлса, уни кенглик, хотиржамликка эришган ҳолида уйғотгин!

Эй Аллоҳ! Ким маҳзунлик, хафалик устида ухлаган бўлса, уни ҳурсандчилик, шодликка эришган ҳолида уйғотгин!

Эй Аллоҳ! Ким бемор ҳолда ухлаган бўлса, уни соғлом, офиятга эришган ҳолида уйғотгин!

Эй Аллоҳ! Ким қийинчилик устида ухлаган бўлса, уни енгилликка эришган ҳолида уйғотгин!

88. Али розияллоҳу анҳу: “Дунё ва охират машриқ билан мағриб кабидир. Агар улардан бирига яқинлашсанг, бошқасидан узоқлашасан” дедилар.

89. Уйингнинг ҳажми ҳар қанча катта бўлса ҳам, машинанг ҳар қанча янги бўлса ҳам, банкдаги ҳисоб рақамингдаги пулинг ҳар қанча кўп бўлса ҳам, қабрларимиз доимо бир хил узунликда ва бир хил кенгликда қилиб кавланади. Шундай экан, ТАВОЗЕЪЛИ БЎЛ!

90. Гапиролмайдиган киши Аллоҳнинг Китобини тартил билан ўқишни орзу қилади.

Эшитолмайдиган киши Аллоҳнинг Китобининг тиловатини эшитишни орзу қилади.

Кўролмайдиган киши Аллоҳнинг Китобини кўришни орзу қилади.

 Бизни эса, телефонларимиз ҳалок қилди. Яъни телефонларга кўп вақт сарфлаб, Қуръонни кам ўқияпмиз.

Қуйидаги маълумотлар фейсбукдаги “Роваиъул фикр” (Фикр дурдоналари), “Ховатир роқия” (Салмоқли фикрлар) каби саҳифалардан олинган.

Нозимжон Ҳошимжон таржимаси