Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

97. Батаҳқиқ, уларнинг айтаётганларидан сенинг кўксинг сиқилишини Биз яхши билурмиз.

Набий алайҳиссалом ҳам одам боласи эдилар. Гоҳида мушрикларнинг қилмишларидан, гап-сўзларидан юраклари сиқилар, кўнгиллари ғаш бўлар эди.

Аллоҳ таоло ушбу оятда у зоти бобаракотнинг кўнгилларини кўтармоқда. Юраклари сиқилишини яхши билишини хабар қилмоқда. Шунингдек, келаси оятларда бундай ҳолларда ўзларини қандай тутишлари кераклигини маслаҳат бермоқда:

98. Бас, Роббингни ҳамди ила поклаб ёд эт ва сажда қилувчилардан бўл.

Аллоҳга ҳамд айтиш, Уни тасбеҳ айтиб, поклаб ёд этиш ва намоз ўқиб, ибодат қилиш жоҳил одамлардан етган озорларни енгиллаштиради.

99. Ва сенга аниқ нарса (ўлим) келгунича, Роббингга ибодат қил.

Ўлим ҳақ. Унинг келиши аниқ. Шунинг учун «аниқ нарса» – «яқийн» деган номни олгандир. Оятда бу маънода «яқийн» сўзи қўлланилган. Ҳа, ўша аниқ нарса, яъни ўлим келгунича, Аллоҳга ихлос билан ибодат қилмоқ зарур.