Бақара cураси, 138-оят
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аллоҳнинг «бўёғ»ини лозим тутинг. Аллоҳдан кўра «бўёғ»и яхшироқ ким бор?! «Ва биз Унга ибодат қилувчилармиз». Бақара 138.
Ушбу оятдаги «бўёқ» калимаси рамзан динни англатади. Бирор нарсага зеб берилмоқчи бўлса, унга бўёқ суркалади. Инсонни гўзал қилиб кўрсатадиган нарса эса диндир. Ҳақиқий диндор шахсда унинг аломатлари яққол кўзга ташланиб туради. Шу маънода, инсон агар гўзал бўлиш учун турли бўёқлардан – дин ва тузумлардан бирини танлаши лозим бўлса, нимани танлаши керак? Албатта, ҳеч қандай гап-сўзсиз, Аллоҳнинг буёғини (динини) тутиши лозим. Чунки Аллоҳнинг бўёғидан (динидан) ўзга чиройлироқ бўёқ йўқ!
Ояти кариманинг охирида Аллоҳнинг сўзларига бевосита мўмин-мусулмон бандаларининг сўзлари улаб юбориляпти:
«Ва биз Унга ибодат қилувчилармиз», – дейишмоқда мўминлар. Бу ҳол мусулмонлар учун улкан шарафдир. Аллоҳ таоло Ўзининг ўгитига мўмин-мусулмонларнинг эътирофларини қўшиб баён қилмоқда.
Келаси оятда аввалги мавзу давом эттирилиб, Набий соллаллоҳу алайҳи васалламга ғайридинларга айтишлари лозим бўлган гаплар ўргатилади.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
