Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Инсон ҳужайрасининг ҳозиргача олинган энг сўнгги тасвири. Расм манбаси Гарвард университети (2020 йил, декабрь)

Расмда битта ҳужайранинг ички тузилиши акс этган. Худди ичида турли дизайндаги корхона, хиёбон, ранг-баранг дарахтлари бор шаҳарга ўхшайди.

Бизнинг ҳужайралар ҳеч қачон шаклланишдан тўхтамайди. Ҳужайралар тананинг қурилиш блокларидир. Ҳар сонияда инсон танаси 25 миллион янги ҳужайра ишлаб чиқаради. Таққослаш учун, танамиз ҳар 13 сонияда Қўшма Штатлар аҳолиси сонидан кўпроқ ҳужайра ишлаб чиқаради.

Вояга етган инсон танасида тахминан 40 триллиондан ортиқ ҳужайра бор.

Микроскопсиз кўриб бўлмайдиган даражадаги ҳужайранинг ичига бизга маълум ва номаълум нарсаларни жойлаб, ҳар бирига вазифасини юклаган Аллоҳ таоло буюк, пок зотдир!

Аллоҳ таоло Қуръони Каримда шундай деб марҳамат қилган:

سَنُرِيهِمْ آيَاتِنَا فِي الْآفَاقِ وَفِي أَنفُسِهِمْ حَتَّىٰ يَتَبَيَّنَ لَهُمْ أَنَّهُ الْحَقُّ ۗ أَوَلَمْ يَكْفِ بِرَبِّكَ أَنَّهُ عَلَىٰ كُلِّ شَيْءٍ شَهِيدٌ

«Уларга ҳам уфқлардаги, ҳам ўзларидаги оят(белги)ларимизни яқинда кўрсатамиз. Токи, уларга унинг ҳақлиги равшан бўлсин. Роббинг ҳар бир нарсага шоҳид экани кифоя қилмасми?!» (Фуссилат сураси, 53-оят).

Аллоҳ таоло бу оятда бизни ўраб турган борлиқда ва танамизда Ўзининг борлигига ва бирлигига далолат қиладиган далиллар, ишораларни келажакда намоён қилишини баён этяпти. Ушбу далиллар, ишораларни ўрганган ва улар ҳақида тафаккур қилганларга Қуръони Каримнинг илоҳийлиги ва Пайғамбаримиз соллаллоҳу алайҳи васалламнинг ҳақ пайғамбарликлари ойдинлашади.

Ҳужайранинг асоси бўлган цитоплазманинг 80 фоизи, кўплаб организмлар 50-90 фоиз сувдан таркиб топгани маълум бўлди. Танамизнинг тахминан 70 фоизи, миямиз, кўзимизнинг асосий қисми сувдан иборат.

Аллоҳ таоло Қуръони Каримда шундай деб марҳамат қилган:

أَوَلَمْ يَرَ الَّذِينَ كَفَرُوا أَنَّ السَّمَاوَاتِ وَالْأَرْضَ كَانَتَا رَتْقًا فَفَتَقْنَاهُمَا ۖ وَجَعَلْنَا مِنَ الْمَاءِ كُلَّ شَيْءٍ حَيٍّ ۖ أَفَلَا يُؤْمِنُونَ

«Куфр келтирганлар осмонлару ер битишган бўлганини, бас, уларни очганимизни ва сувдан ҳар бир тирик нарсани қилганимизни билмайдиларми? Иймон келтирмайдиларми?» (Анбиё сураси, 30-оят).

Сувдан яратилган барча жонзотлар, ўсимликлар яшаши учун сувга эҳтиёж сезишини барчамиз биламиз.

Демак, яратилишимиз ҳам сувдан, яшашимиз учун ҳам сувга эҳтиёжимиз бор.

Аллоҳ таоло барчамизни Ўзининг ҳидоятидан айирмасин ва хотимамизни чиройл қилсин!

Islom.uz, Quran.ksu.edu.sa ва бошқа интернет маълумотлари асосида Нозимжон Ҳошимжон тайёрлади