Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

عَنْ أُسَيْدِ بْنِ ظُهَيْرٍ رَضِي اللهُ عَنْهُ ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: الصَّلَاةُ فِي مَسْجِدِ قُبَاءٍ كَعُمْرَةٍ. رَوَاهُ التِّرْمِذِيُّ وَالنَّسَائِيُّ.

Усайд ибн Зуҳайр розияллоҳу анҳудан ривоят қилинади:

«Набий соллаллоҳу алайҳи васаллам:

«Қубо масжидидаги намоз худди умра кабидир», дедилар».

Термизий ва Насаий ривоят қилганлар.

Шарҳ: Аввало ушбу ҳадиснинг ровийcи Усайд ибн Зуҳайр розияллоҳу анҳу билан танишиб олайлик.

Усайд ибн Зуҳайр ансорлардан бўлиб, Авс қабиласидан эдилар. Бу саҳоба Расулуллоҳ соллаллоҳу алайҳи васалламдан кўплаб ҳадислар ривоят қилдилар. У киши Абдулмалик ибн Марвоннинг халифалик даврларида вафот этдилар.

Бу ҳадиси шарифда Қубо масжидида ўқилган бир намознинг савоби умра қилганнинг савобига тенг келиши таъкидланмоқда.

Бу эса Қубо масжидини Исломдаги тўртинчи мартабадаги масжид дея эътироф этишимизга асос бўлади. Чунки бошқа масжидлар ҳақида бу маънодаги ҳадислар айтилмаган.

«Ҳадис ва ҳаёт» китоби асосида тайёрланди»