Масжидун Набавийдаги Равзада намоз ўқишга интилинг!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ҳозир карантин сабаб Ҳаж, Умра зиёратларига фақат Саудия Арабистони фуқаролари учун рухсат берилган. Аллоҳ таоло насиб этиб, йўл очилса, Ҳаж, Умрага борганимизда, албатта, Равзада намоз ўқишга уринайлик!
Пайғамбаримиз соллаллоҳу алайҳи васалламнинг минбарлари билан уйлари орасида Равза деган жой бор. Минбардан шарафли уйгача бўлган масофа тахминан 26,5 метрни ташкил этади. Бугунги кунда ушбу жой яшил гилам билан белгилаб қўйилган. Ушбу Равзанинг фазли ҳақида Набий соллаллоҳу алайҳи васалламдан ҳадислар ворид бўлган.
Абдуллоҳ ибн Зайд розияллоҳу анҳудан қилинган ривоятда Набий соллаллоҳу алайҳи васаллам «Уйим билан минбарим орасида жаннат равзаларидан бир равза бор» дедилар.
Имом Аҳмад, Бухорий, Муслим, Насоий ва бошқалар ривоят қилишган.
Имом Бухорий ва Имом Муслим ривоят қилган ва муттафақун алайҳ даражасига кўтарилган худди шундай матн Абу Ҳурайра розияллоҳу анҳудан ҳам ривоят қилинган.
Имом Аҳмаднинг «Муснад»ларида ҳадисдаги «Уйим» сўзининг ўрнига «Қабрим» сўзи келган экан.
«Равза» сўзи боғ деган маънони англатади.
Албатта, ушбу жойда намоз ўқиш, Қуръон тиловат қилиш, Аллоҳ таолони зикр қилиш, Пайғамбаримиз соллаллоҳу алайҳи васалламга саловот ва салом айтиш, солиҳ амалларни кўплаб қилишнинг ажру савоби кўпроқдир.
Баъзи уламолар Равза ҳақиқий маънода жаннатдан бир парчадир деганлар.
Ҳаж, Умрага борганда, Пайғамбаримиз соллаллоҳу алайҳи васалламнинг қабрларини зиёрат қилиб, масжидларида намоз ўқиш учун кирган мусулмонлар ушбу Равзада намоз ўқиш учун навбатда турадилар.
Аллоҳ таоло барчамизни Ўзининг Байтини ҳаж қилишимизни, Пайғамбаримиз соллаллоҳу алайҳи васалламнинг қабрларини зиёрат қилиб, Равзада намоз ўқишимизни насиб этсин!
Нозимжон Ҳошимжон тайёрлади
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
