Жаннат энг буюк мукофотдир
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Уҳуд кунида Қатода ибн Нуъмон розияллоҳу анҳу битта кўзини қўлида кўтариб Расулуллоҳ соллаллоҳу алайҳи васалламнинг ҳузурларига келди.
Расулуллоҳ соллаллоҳу алайҳи васаллам ундан сўрадилар:
- Бу нима эй Қатода?
Қатода деди:
- Кўраётганингиз эй Аллоҳнинг Расули!
Расулуллоҳ соллаллоҳу алайҳи васаллам:
- Агар истасанг сабр қил, жаннат сеники бўлади. Агар истамасанг кўзингни жойига қайтариб Аллоҳга дуо қиламан, олдингидек бўлади!
Қатода деди:
- Эй Аллоҳнинг Расули! Аллоҳга қасамки, жаннат энг буюк мукофотдир. Аммо мен аёлларни яхши кўраман. Мени «ғилай» деб истамай қўйишларидан қўрқаман. Кўзимни жойига қайтариб менга жаннатни ҳам сўраб беринг!
Расулуллоҳ соллаллоҳу алайҳи васаллам дедилар:
- Шундай қиламан эй Қатода!
Расулуллоҳ соллаллоҳу алайҳи васаллам Қатоданинг қўлидан кўзини олиб жойига қўйдилар!
Бундан шу фикр чиқадики, мўъмин балога эмас, унга қилган сабрига мукофот олади!
Кишининг фақирликни, йўқсилликни, беморликни ёмон кўриши унинг фитратида бор. Савоб умидида бу нарсаларни Аллоҳдан сўрайдиганлар топилмайди.
Биз доимо Аллоҳдан офият сўраймиз. Аммо бошимизга бало тушса сабр қиламиз, савоб умид қиламиз, одоб доирасида турамиз!
Биз энди Аллоҳнинг қазо ва қадари олдидамиз!
Абдулқодир Полвонов
Ушбу мақола (видео материал) Ўзбекистон Республикаси Дин ишлари бўйича қўмитанинг 2023 йил 14 мартдаги 03-07/1733-рақамли хулосаси асосида тайёрланди
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
