Диний қўмита Умра лицензияси учун янги талабларни эълон қилди
2024 йил 9 октябрь куни “Умра тадбирларини ташкил этиш ва ўтказиш билан боғлиқ чора-тадбирларни янада такомиллаштириш тўғрисида”ги Вазирлар Маҳкамасининг 300-сонли қарори қабул қилинди. Бу ҳақда Замон информацион дастурида хабар берилди.
Маълумки, 2024 йил 2 июлда қабул қилинган қонун билан жорий йил 5 октябрдан Дин ишлари бўйича қўмита Умра хизматини кўрсатиш бўйича лицензия берувчи ваколатли орган сифатида белгиланди. Вазирлар маҳкамасининг 300-сонли қарори билан Дин ишлари бўйича қўмита лицензиясининг шартлари эълон қилинди. Хусусан, қуйидаги лицензия талаб ва шартлари жорий этилмоқда:
•1 миллион АҚШ доллари миқдоридаги маблағни “Зиёрат жамғармаси”га захира қилиб қўйиш;
•Зиёратчиларнинг гуруҳ раҳбари этиб Ўзбекистон мусулмонлари идораси билан тузиладиган шартнома асосида диний билим ва кўникмаларга эга бўлган мутахассисни тайинлаш;
• Турфирма штатида диний (исломий) таълим йўналишлари бўйича бир нафар мутахассиснинг мавжудлиги тўғрисидаги маълумот;
• Вояга етмаган фуқароларга хизмат кўрсатмаслик;
• Ўз фаолиятини туроператор ва турагентлар орқали амалга оширмаслик;
• Зиёратчилар учун Саудия Арабистонининг фақат “Умра визаси”ни расмийлаштириш – бошқа виза билан олиб бориш ноқонуний ҳисобланади;
• Умра хизматлари Саудия Арабистони подшоҳлигидаги ҳамкор ташкилот ўртасида имзоланадиган шартномага мувофиқ амалга ошириш ва улар кўрсатадиган хизматлар учун тўловларни банк муассасалари орқали амалга ошириш;
• Зиёратчиларга сифатли хизмат кўрсатиш, хусусан, ўз вақтида тиббий хизмат кўрсатишни таъминлаш;
• Халқаро йўналишда 2 йилдан кам бўлмаган тажрибага эга, бу даврда йўловчи ташишнинг халқаро ва миллий қонунчилик талабларини бузмаган авиакомпания билан ҳамкорлик қилиш;
• Зиёратчиларни юборишдан олдин уларга бориш ва қайтиш авиачипталарини харид қилиш;
• Зиёратчиларни тоифаси 3 юлдуздан кам бўлмаган меҳмонхоналарга жойлаштириш;
• Умра хизматини 3-давлатлар орқали кўрсатмаслик;
• Хизматларни лицензияда кўрсатилган манзилдан бошқа жойдаги ваколатхона ёки филиал орқали кўрсатмаслик.
Умра зиёрати хизматини кўрсатиш бўйича лицензия соҳасидаги қонунбузарлик учун юридик шахсларга солинадиган жарима миқдори БҲМнинг 200 баравари (75 млн сўм) этиб белгиланган.
Расмийларга кўра, талабларнинг кучайтирилиши Умра зиёратига олиб борувчи айрим турфирмалар “визаларни сохталаштириш, меҳмонхоналарда жой банд қилмаслик, қайтиш авиачипталарини харид қилмаслик” каби ташкилий камчиликларга йўл қўйган. Натижада 13 мингдан зиёд фуқаролар хорижда сарсон бўлган, бир неча минг фуқаро Саудия Арабистонида бўлиш қоидаларини бузгани учун депорт қилинган.
Маълум қилинишича, Ўзбекистонда бугунги кунга қадар 100 минг доллардан кам бўлмаган захира маблағларини тегишли ҳисоб рақамга қўйган 80 га яқин тур фирма фаолият олиб борган.
Ўзбекистонда 2022 йил охирида Умра сафарини сайёҳлик фирмалари орқали ҳам ташкил этишга қисман рухсат берилган эди.
Кейинроқ ҳукумат қарори билан 2023 йил 1 ноябрдан Умра тадбирларини ташкил этувчи турфирмаларнинг иши қийинлаштирилди. Хусусан, уларга лицензия олиш учун 100 минг доллардан кам бўлмаган маблағни банк реквизитига захира қилиш мажбурияти юкланди.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
