"Фотиҳа"дан кейин зам сура қилиш
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам:
«Сиздан бирортангиз, қачон аҳлига қайтса, у ерга учта катта, семиз бўғоз туяни топишни яхши кўрадими?» дедилар.
«Ҳа», дедик.
«Сиздан бирингиз ўз намозида ўқиган уч оят, унинг учун учта катта, семиз бўғоз туядан яхшироқдир», дедилар».
Муслим ривоят қилган.
Шарҳ: Бу ҳадиси шарифдан мусулмон инсон ўз намозида қироат қилган ҳар бир оят Қуръон учун битта катта, семиз бўғоз туяни садақа қилганнинг савобини олишини билиб оламиз.
Маълумки, ўша вақтларда бир одам эга бўлиши мумкин бўлган энг катта мулк катта, семиз бўғоз туя бўлган. Ундан бошқа бирор нарсага яроқли мулк бўлмаган. Биров уйига келиб, учта катта, семиз туя ўзига мулк бўлиб турганини кўрса қанчалар қувонади. Намозида уч оят Қуръон тиловат қилган одам ҳам, яна шунчалик қувонса бўлаверар экан. Энди уч эмас, ўттиз ёки ундан кўп оятни ўқиган одам нималарга эришади ўйлаб кўрайлик-а!
Аллоҳ таоло сиз билан биз мусулмонларни қанчалар улуғлаб қўйган. Савоб олиш йўлларимизни қанчалар осон қилиб қўйган! Лекин, биз шу нарсани тўлиқ англаб етамизми? Унинг қадрига етамизми? Ундан керакли даражада фойдалана оламизми?
Демак, намозда кўпроқ оятларни ўқишга ҳаракат қилайлик. Ҳар бир оят учун бир катта, семиз бўғоз туя садақа қилганга савоб олишимизни унутмайлик.
Абу Қатода розияллоҳу анҳудан ривоят қилинади:
«Набий соллаллоҳу алайҳи васаллам Пешин намозининг аввалги икки ракъатида китобнинг «Фотиҳа»си ила икки сура ўқир, биринчисида узоқ қилар, иккинчисида қисқа қилар эдилар. Аҳёнда оятни эшиттириб қўяр эдилар. Асрда ҳам шундоқ қилар эдилар. Бомдод намозининг биринчи ракъатида (қироатни) узоқ қилар, иккинчисида қисқа қилар эдилар».
Бешовларидан фақат Термизий ривоят қилмаган.
Шарҳ: Ушбу ҳадисдан олинадиган фойдалар:
1. Намозда «Фотиҳа» сурасидан кейин Қуръоннинг бошқа сурасини ҳам ўқиш кераклиги.
Буни зам сура қилиш, дейилади. Зам қўшиш, дегани. Зам сура қилиш Ҳанафий мазҳаби бўйича вожиб. Бошқа мазҳабларда суннат.
2. Пешин тўрт ракъат фарзининг биринчи икки ракъатида «Фотиҳа»дан кейин зам сура қилиш.
3. Биринчи ракъатга узунроқ сурани, иккинчи ракъатга қисқароқ сурани қўшиш.
4. Набий соллаллоҳу алайҳи васаллам кундузги – Пешин намозида аҳёнда баъзи оятларни эшиттириб қўйишлари.
5. Кундузги намозлар – Пешин ва Асрда қироат махфий бўлиши.
6. Аср намозида ҳам аввалги икки ракъатнинг биринчисига узунроқ, иккинчисига қисқароқ зам сура қилиш.
7. Бомдод намозининг биринчи ракъатида қироатни узун иккинчисида қисқароқ қилиш.
Имом Бухорий ва Имом Муслим қилган ривоятда Набий соллаллоҳу алайҳи васаллам, Бомдод намозида олтмиш ила юз оят ўртасида қироат қилишлари айтилган.
Хаббобга:
«Набий соллаллоҳу алайҳи васалламнинг Пешин ва Асрдаги қироатларини нимадан билар эдингиз?» дейилди.
«Соқолларини қимирлашидан», деди».
Бухорий ва Абу Довуд ривоят қилганлар.
Шарҳ: Бу ривоятдан Пешин ва Аср намозида қироат махфий бўлиши очиқ-ойдин айтилиб турибди. Саҳобалар фақат Пайғамбаримиз соллаллоҳу алайҳи васаллам соқолларининг қимирлашидан у кишининг қироат қилаётганларини билиб олар эканлар.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
