«Уммул Киром» лақабли олима
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Уммул Киром Карима бинт Аҳмад ибн Муҳаммад Марвазия фақийҳа, олима ва ҳадис илми билимдонидир. Юз йил яшади ва бокира ҳолда вафот этди.
Ислом дини ва шаръий илмлар хизматида катта ўрин тутгани учун тарихчи олимлар олимага «Уммул Киром» лақабини беришган.
Карима Маккадаги Масжидул Ҳаромга қўшни бўлган ва илм талабида отаси билан бирга кўп ўлкаларга сафар қилган. Умрини илм ёдлаб, ривоят қилиб, ўрганиб, кўпчиликка ўргатиб ўтказди. Олиманинг ўша даврда кўплаб шогирдлари йирик фақиҳ бўлиб етишдилар.
Замондошлари Каримани фаҳми ўткир, зийрак муҳаддиса ва фозила дея сифатлаганлар.
Саҳиҳул Бухорийнинг энг олий санадлари Каримага етиб боради. Зеро, Карима Саҳиҳул Бухорийни ривоят қилиш ва уни бошқаларга ўқиб эшиттириш билан машҳур бўлган. Натижада Кариманинг исми Саҳиҳул Бухорий номи билан боғланган. Қайси олим Кариманинг таржимаи ҳолини ёзса, унинг Саҳиҳул Бухорийга алоқадорлигига ишора қилиб ўтади.
Олима ҳақида Имом Заҳабий қуйидагиларни айтган: «Карима шайха, олима, фозила, ишончли санад вакиласидир. Уммул Киром Карима бинт Аҳмад ибн Муҳаммад Марвазия Аллоҳнинг Ҳарамига қўшни бўлган... Саҳиҳни кўп марта ривоят қилган... Асло турмушга чиқмаган ва бокира ҳолда вафот этган».
Карима фиқҳ илмларини йирик фуқаҳолар ва уламолардан олган. Масалан, Зоҳир ибн Аҳмад Сарахсий, Абдуллоҳ ибн Юсуф Асбаҳоний ва бошқалар.
Карима Марвазия 463 ҳижрий йилда вафот этган. Аллоҳ таоло олимани раҳматига олган бўлсин!
Нозимжон Ҳошимжон
Ушбу мақола Ўзбекистон Республикаси Дин ишлари бўйича қўмитасининг 2025 йил 4 мартдаги 03-07/1462-сонли рухсати асосида тақдим қилинди.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
