Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

وَقَالَ سُوَيْدُ بْنُ النُّعْمَانِ رَضِي اللهُ عَنْهُ: خَرَجْنَا مَعَ النَّبِيِّ صَلَّى اللهُ عَلَيْهِ وَسَلَّمَ إِلَى خَيْبَرَ، فَلَمَّا كُنَّا بِالصَّهْبَاءِ دَعَا بِطَعَامٍ فَمَا أُتِيَ إِلَّا بِسَوِيقٍ فَأَكَلْنَا، فَقَامَ إِلَى الصَّلَاةِ فَتَمَضْمَضَ وَمَضْمَضْنَا. رَوَاهُ الْبُخَارِيُّ.

«Сувайд ибн ан-Нуъмон розияллоҳу анҳу:

«Набий соллаллоҳу алайҳи васаллам билан Хайбарга чиқдик. Саҳбога етганимизда у зот таом опкелтирдилар. Талқондан бошқа ҳеч нарса келтирилмади. (Ўшани) едик. Сўнг у зот намозга турдилар ва оғизларини яхшилаб чайдилар. Биз ҳам чайдик».

Бухорий ривоят қилган.

Овқатланишнинг исломий маданияти ҳар бир мусулмондан ҳар бир таомдан сўнг оғзини яхшилаб чайишини талаб қилади. Бу ишни Пайғамбар соллаллоҳу алайҳи васаллам қилганликлари ҳақида ривоятлар кўп. Оғизнинг доимо тоза-пок туришига мусулмонлар катта эътибор берганлар. Оғиз билан Қуръони Карим, ибодат дуолари ўқилади, Аллоҳ таолонинг зикри қилинади. Шунинг учун у доимо пок бўлиши, ундан ҳид чиқмаслиги кераклиги мусулмонлар ёдидан ҳеч қачон кўтарилмаган.

Ҳозирги кунда ҳар бир таомдан кейин оғизни тозалаш лозимлиги соғлиқни сақлашнинг энг муҳим омили эканлиги сир бўлмай қолди. Буни Ислом дини ўн тўрт аср олдин йўлга қўйганини эса баъзи мусулмонман, деб юрганлар ҳам билмасалар керак.

«Ҳадис ва ҳаёт» китоби 16-жуз

Ўзбекистон Республикаси Дин ишлари бўйича қўмитанинг 2021 йил 17 июндаги 03-07/3903- рақамли хулосаси асосида тайёрланди.