Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

عَنِ ابْنِ عُمَرَ رَضِي اللهُ عَنْهُ ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: إِذَا اسْتَأْذَنَكُمْ نِسَاؤُكُمْ بِاللَّيْلِ إِلَى الْمَسْجِدِ فَأْذَنُوا لَهُنَّ. رَوَاهُمَا الشَّيْخَانِ.

Ибн Умар розияллоҳу анҳудан ривоят қилинади:

«Набий соллаллоҳу алайҳи васаллам:

«Сиздан аёлларингиз кечаси масжидга бориш учун изн сўраса, уларга изн беринг», дедилар».

Иккисини икки Шайх ривоят қилганлар.

Ҳадиси шарифдан олинадиган фойдалар:

1. Аёллар масжидга ҳам эрларининг изни билан боришлари кераклиги.

2. Кечаси хотин масжидга бориш учун изн сўраса, рухсат бериш кераклиги.

وَعَنْهُ عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: لَا تَمْنَعُوا إِمَاءَ اللهِ مَسَاجِدَ اللهِ. رَوَاهُ الشَّيْخَانِ وَأَبُو دَاوُدَ، وَزَادَ: وَلَكِنْ لِيَخْرُجْنَ وَهُنَّ تَفِلَاتٌ.

Яна ўша кишидан ривоят қилинади:

«Набий соллаллоҳу алайҳи васаллам:

«Аллоҳнинг чўриларини Аллоҳнинг масжидларидан ман қилманглар», дедилар».

Икки Шайх ва Абу Довуд ривоят қилганлар ҳамда:

«Лекин хушбўйланмасдан чиқсинлар» жумласини зиёда келтирганлар.

Шарҳ: Ушбу ҳадисдан оладиган фойдаларимиз:

1. Аёлларни масжидларга боришдан ман қилмаслик.

2. Аёллар масжидга борсалар, хушбўй нарсалар суртмай боришлари шарт эканлиги.

Эътибор берадиган бўлсак, биринчи ҳадисда аёл киши масжидга борса, эркак кишиларнинг кўзига кўринмаслиги зарур эканлиги таъкидланган эди. Бу ҳадисда эса масжидга борган аёл кишининг ҳиди эркак кишининг димоғига кириши дуруст эмаслиги айтилмоқда.

«Ҳадис ва ҳаёт» китоби асосида тайёрланди