Саудияда «Виртуал қора тош» лойиҳаси расман жорий қилинди
Саудия Арабистони икки муқаддас масжид қўриқчилари институти билан ҳамкорликда мусулмонларга Ҳажарул асвадни виртуал реаллик (VR) технологияси орқали дунёнинг исталган нуқтасидан кўриш имконини берувчи «Виртуал қора тош» лойиҳасини расман жорий қилди.
Виртуал қора тош лойиҳаси икки муқаддас масжид имоми, доктор, шайх Абдулраҳмон ибн Абдулазиз ал Судайс томонидан очилди.
Унинг сўзларига кўра, виртуал олам орқали бутун дунёни кўриш, хусусан, икки муқаддас масжидга бориш каби барча ҳисларни, самимийликни рағбатлантириш учун виртуал симуляция муҳитини яратиш жуда ҳам муҳимдир.
Шайх Судайснинг қўшимча қилишича, икки муқаддас масжидда диний ва тарихий обидаларнинг мавжуд эканлиги, уларни рақамлаштириш ҳамда Саудия раҳбарияти томонидан тақдим этилган энг сўнгги технологик воситалар орқали бутун дунёга етказиш кераклиги қайд этилди.
Шунингдек, «Виртуал қора тош» технологиясини яратишда меҳнат қилган жамоаларнинг саъй-ҳаракатлари эътироф этилиб, уларнинг ҳақига Аллоҳ таолодан ҳидоят ва муваффақиятлар бўлиши сўралди.
Очилиш маросимида бир қатор университет ва ҳукумат амалдорлари, жумладан, «Виртуал қора тош» лойиҳасини яратишда хизмат қилган Уммул Қуръон университети раҳбари Турки ибн Сулаймон Ал-Амро иштирок этди.
Жамоатчилик ушбу виртуал реаллик технологиясидан қандай ва қачон фойдалана олиши ҳозирча аниқ бўлмаса-да, бу ташаббус рақамли технологиянинг бир қисми бўлиши ва Маккадаги «Икки муқаддас масжид»нинг архитектура кўргазма марказида намойиш этилиши айтилмоқда.
Ташаббус кўргазма ва музей ишлари агентлиги ҳамда Уммул Қуръон университети ҳамкорлигида амалга оширилган қўшма лойиҳа ҳисобланади.
Хуршид Маъруф тайёрлади
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
