Ҳасад самимийликнинг зиддидир
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Доктор Салоҳ Абулҳож ҳафизаҳуллоҳ ҳасад ҳақида шундай дейди: «Ҳасадчи Аллоҳ таолонинг неъматига душман, иродасига кўнмаган ўжар ва қазосидан норози, ғазаб қилган инсондир. Бунинг маъноси қуйидагича: «Ҳасад насиҳатни, самимийликнинг зиддидир».
Самимийлик – Аллоҳ таолонинг мусулмон биродарингга берган неъматини, ундаги салоҳияти билан бирга қолишини исташинг, хоҳлашингдир.
Бу ҳасаднинг айнан хилофидир. Ҳасад бўлса, ўша неъматни у инсонда завол топиб қуйи бўлишини хоҳлашдир.
Ҳасад — бирон фойдаси бўлмаган ғам-ташвиш ва машаққатни юзага келтирувчи, хатоларни пайдо қилувчи, тоат-ибодатларни фасод этиб бузувчи амалдир».
Уламолар, ҳасад бировга етган неъматга рашк билан қараш ва ўша неъматнинг ўз соҳибидан кетиб, ҳасадчига етиб келишини қаттиқ хоҳлашдир, дейдилар.
Ҳаётнинг энг майда икир-чикирларидан тортиб энг баланд чўққиларигача ҳар нарсада ҳасад бордир.
Агар инсон бошқа бир кишига етган неъматдан севиниб, ўша неъматнинг ўз эгасида барқарор бўлишини хоҳлагани ҳолда, ўзига ҳам шундай неъмат берилишини тиласа, ҳавас қилган бўлади.
Аллоҳ таоло бир қанча оятларда ҳасадни қоралаган ва ҳасадчининг ҳасадидан паноҳ сўрашга чақирган.
Жумладан, «Нисо» сурасида шундай марҳамат қилади:
«Ёки Аллоҳ одамларга Ўз фазлидан берган нарсаларга ҳасад қилмоқдаларми?...» (54-оят).
Аллоҳ таоло «Фалақ» сурасида:
«Тонг Роббисидан паноҳ сўрайман. У яратган нарсалар ёмонлигидан. Ва кириб келган қоронғу кечанинг ёмонлигидан. Ва тугунларга дам солувчилар ёмонлигидан. Ва ҳасад қилган ҳасадчининг ёмонлигидан», деб айт», деган (1-5-оятлар).
Ўзи бошидан-оёғигача неъматга кўмилиб туриб, бошқаларга берилган неъматга ҳасад қилиш, аслида табиати бузуқ одамларнинг иши ҳисобланади. Бу жуда ҳам ёмон, ҳамма ёқни расво қиладиган ҳасаддир.
Исломда бошқа маънавий жиноятлар қатори ҳасад қаттиқ қораланади ва катта гуноҳ ҳисобланади.
Аллоҳ таоло бу иллатдан Ўзи паноҳ берсин.
Интернет манбалари асосида Хуршид Маъруф тайёрлади
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
