Саломни кенг ёйиш ва акса урганда Аллоҳга ҳамд айтиш | Сийрат дарслари (355-дарс)
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
794. Абу Ҳурайра розияллоҳу анҳудан ривоят қилинади:
«Бирортангиз бир биродарини учратса, салом берсин. Ораларини дарахт, девор ёки тош ажратса, қайта учрашганларида яна салом берсин».
Абу Довуд ривоят қилган.
795. Анас ибн Молик розияллоҳу анҳудан ривоят қилинади:
«У ёш болалар олдидан ўтаётиб, уларга салом берди ва: «Набий соллаллоҳу алайҳи васаллам буни қилардилар», деди».
Бухорий ва Муслим ривоят қилишган.
796. Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам: «Отлиқ пиёдага, пиёда ўтирганга ва озчилик кўпчиликка салом беради ва кичик каттага салом беради», дедилар».
Бухорий, Муслим ва Термизий ривоят қилишган.
797. Абдуллоҳ ибн Умар розияллоҳу анҳумодан ривоят қилинади:
«Бир киши Расулуллоҳ соллаллоҳу алайҳи васалламга салом берди. У зот таҳорат ушатаётган эдилар, саломга алик олмадилар».
Муслим ривоят қилган.
798. Қатода розияллоҳу анҳудан ривоят қилинади:
«Мен Анасга: «Набий соллаллоҳу алайҳи васалламнинг саҳобаларида қўл олиб кўришиш бормиди?» дедим. «Ҳа», деди».
Бухорий ривоят қилган.
799. Анас ибн Молик розияллоҳу анҳудан ривоят қилинади:
«Набий соллаллоҳу алайҳи васалламнинг ҳузурларида икки киши акса урди. Шунда у зот улардан бирига тилак билдирдилар ва бошқасига тилак билдирмадилар. Сўнг у зотга бу ҳақда айтилди. «Буниси Аллоҳга ҳамд айтди. Униси эса, Аллоҳга ҳамд айтмади», дедилар».
Бухорий ва Муслим ривоят қилишган.
«Расулуллоҳ соллаллоҳу алайҳи васаллам» китобидан
Ушбу китоб Ўзбекистон Республикаси Дин ишлари бўйича қўмитанинг 2022 йил 30 ноябрдаги 03-07/9078-рақамли хулосаси асосида чоп этилган.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
